雞煲@home

肥太我好似好耐無cooking....
其實唔係架...dayday都有，but 唔係太特別就無post 出黎
廢事比大家笑嘛....

今日...我煮左個....好似好難整....但原來超簡單既雞煲!
又可以自己調辣既程度...又可以加自己喜歡既食物...
最緊要係 -- 平到笑!

出面叫一個雞煲...都要百幾二百蚊....
我今晚呢個雞煲，只係需要五十蚊有找呢~
最貴就係隻雞.....hk$35@百佳..........
有芝麻雞大約hk$29.9，但我去到百佳已無晒lu~
同老公行左去惠康，見到有hk$29.9 既芝麻雞....但係.....有頭架.....
老公問我夠唔夠膽切個頭.....我...當然.....唔敢!
我寧願比多5蚊去買無頭雞好過平五蚊買有頭雞......巧驚驚呀~

材料:
雞 (我用細雞)
芫茜 (少量)
唐芹 (一條)


醃料:
蠔油 2茶匙
生抽 1茶匙
老抽 2 茶匙
糖 1 少匙
酒 半茶匙

配料:
薑, 蒜頭, 紅蔥頭, 洋蔥, 指天椒, 乾指天椒, 八角, 花椒, 豆辦醬, 桂皮, 香葉及雞湯

做法:
1) 先將雞汆水 (我成隻汆，因為無咁易令雞"鞋"晒), 然後用清水洗洗
2) 切件，將醃料醃雞半小時 (我醃唔夠半小時...不太入味)
3) 先落油, 用中火燒紅煲 (我用鑊煮，所以先燒紅鑊再落油)
4) 先爆香薑, 後放雞炒香, 再加蒜頭, 紅蔥頭, 洋蔥, 指天椒, 乾指天椒, 八角, 花椒, 豆辦醬, 桂皮及香葉
(由於雞既醃料太多水，我兜起左雞同薑，洗洗個鑊再燒紅先爆其他配料)
5) 炒香配料就加雞湯，蓋上煲蓋，大火滾5分鐘，加入芫茜及唐芹即成


由於我老公唔太食得辣，所以我無放乾指天椒.......
味道呢......其實我兩公婆無食過出面真正既雞煲，所以不能評有幾多分似...不過老公話味道都ok......
大家有興趣都試試呀~
當然...如果大家有更好既食譜...麻煩話我知呀....等我改善!
今次個食譜都係由朋友提供架.........